باغیشلا بیزی آزربایجان ،بیزی باغیشلا- امین موحدی
- توضیحات
- منتشر شده در چهارشنبه, 25 تیر 1393 15:49
اوزیمیزی چوخ رکلام ائتدیک آمما سنین ایچین هئچ بیر ایش گوره بیلمه دیک ،باغیشلا بیزی آزربایجان،بیزی باغیشلا .
آلیشدین آته شین دونیانی آلدی ، بيز سنه بیر دامجی سو دا اولماديق
بیز لیدرلیک داواسی آپاران آنلار ،اورمو گولی نین اوره گی یاندی قورودو قالدی آما بیز او نون اوره گینين یئرینه اوز اوره گیمیزه سو سه پيپ هارای چکدیک کی یگانه لیدرآزربایجاندا بیزیک ،باغیشلا بیزی آزربایجان بیزی باغیشلا.
میلتیمیز بیر تورکی مدرسه طلبینده، آیلیق ماعاشین بیر بلیطه وئریب ایستادیوما گتیب هارای چکدی :"تورک دیلینده مدرسه اولمالیدیر هر کسه" اما بیز جور وه جور یوخ تشکیلاتلارا تمثیلچی اولیب سیتهلر آچیب و جور وه جور ژستيله رده رسیم چکیب سیته له ره یئرلشدیردیک وآی نه قده ر اوزیمیزی لیدر قامتینده به یندیک!باغیشلا بیزی آزربایجان،بیزی باغیشلا .
وطن عشقینین یئرینه ،حسد اوره گییمیزی دولديردي و نه یازیقلار اولسون بیزه کی وطن اولادلاری زیندانلاردا آج سوسوز چورویه ن زامان ،اونلارين يئرينه ، ملا حسنی له ری اوزیمیزه قهرمان سئچدیک!باغیشلا بیزی آزربایجان ،بیزی باغیشلا.
هله اوره گیمیزی تار و مار ائده ن قاراباغ نیسگیلی یاددان چیخمامیش قاراداغین زلزه له سی قلبيميزي یئنیده ن آلت اوست ائتد‌ی آمّا نه یازیق کی قارداقیدا ،قارباغ کیمی نه تئز اونوتدوق. قارداغین اوشاقلاری یایدادا سویوقدان اوشویورلر آمما بیزیم اوره گیمیز بیلمیرم نیچين هه له ایستیدییر؟ باغیشلا بیزی آزربایجان ،بیزی باغیشلا.
اوزلگه له ر ايچين جاندان باشدان و مالیمیزدان کئچدیک آمما سنین اوشاقلارینا بیر مدرسه بئله تیکه بیلمدیک ، من سنين اوتری اوزیمی باغیشلامیرام باغیشلا بیزی آزربایجان ،بیزی باغیشلا
